Everyone should plant a sapling and resolve to make it a tree: Konda Surekha
(اپنا ورنگل)
ورنگل :
ریاستی وزیر برائے جنگلات، ماحولیات، اوقاف و مذہبی امور کونڈا سریکھا نے کہا کہ ماحولیاتی تحفظ کے لیے ہر شخص کو پودے لگانے کے ساتھ ساتھ ان کی حفاظت بھی کرنی چاہیے۔ انہوں نے عوام سے اپیل کی کہ ماحولیاتی تحفظ کے عمل میں ہر شخص اپنا حصہ ادا کرے۔ورنگل شہر کے رنگاشائی پیٹ سرکاری جونیر کالج کے احاطے میں منگل کو ضلع کلکٹر ڈاکٹر ستیہ شاردا کی صدارت میں منعقدہ ون مہوتسو پروگرام میں وزیر کونڈا سریکھا نے بحیثیت مہمان خصوصی شرکت کی اور کالج کے احاطے میں پودے لگائے۔
اس موقع پر ضلع کلکٹر ڈاکٹر ستیہ شاردا، ضلع فاریسٹ آفیسر نکیتا اور لائبریری چیئرمین میسالہ پرکاش نے بھی پودے لگائے۔بعد ازاں وزیر نے کالج کے احاطے میں قائم نئے اوپن جِم کا افتتاح کیا اور مختلف محکمہ جات کی جانب سے لگائے گئے اسٹالوں کا معائنہ کیا۔ انہوں نے بتایا کہ ایک ہی دن میں 10 فیصد پودے لگانے کا ہدف مقرر کیا گیا ہے۔کونڈا سریکھا نے کہا کہ ہر گھر کے علاوہ سرکاری و خانگی اسکولوں اور سرکاری دفاتر میں بڑے پیمانے پر پودے لگائے جائیں۔
انہوں نے کہا کہ وقت پر بارش نہ ہونے کی ایک اہم وجہ مناسب درختوں اور جنگلات کی کمی بھی ہے۔ درخت انسانی زندگی کے لیے انتہائی اہم ہیں اور ماحولیاتی توازن برقرار رکھنے کے لیے درختوں کا ہونا ضروری ہے۔ انہوں نے عوام سے اپیل کی کہ پودے لگانے، انہیں درخت بنانے اور ان کی حفاظت کرنے کے عزم کے ساتھ آگے بڑھیں۔وزیر نے کہا کہ سالگرہ، شادی بیاہ اور دیگر خوشی کی تقریبات کے موقع پر پودے لگانے کی روایت کو فروغ دینا چاہیے۔
انہوں نے واضح کیا کہ صرف پودے لگانا کافی نہیں بلکہ ان کی حفاظت کی ذمہ داری بھی سب کو اٹھانی ہوگی اور درختوں کو کاٹنے سے بچانا ہوگا۔ضلع کلکٹر ڈاکٹر ستیہ شاردا نے بتایا کہ ورنگل ضلع میں 25 لاکھ پودے لگانے کا ہدف مقرر کیا گیا ہے، جس میں سے اب تک تقریباً 13 لاکھ پودے لگائے جاچکے ہیں۔ باقی ہدف کو مکمل کرنے کے لیے تمام محکمہ جات کے تال میل سے اقدامات کیے جارہے ہیں۔درختوں کی دولت سے ہی ماحولیاتی توازن: بھدرا دری کوتہ گوڑم ضلع کے سی سی ایف بھیما نائک نے کہا کہ اگر درختوں کی تعداد میں اضافہ ہو تو موسمی تبدیلیوں کے اثرات کم ہوں گے، وقت پر بارش ہوگی اور فصلیں بھی اچھی ہونے کے امکانات بڑھیں گے۔
انہوں نے ہر شخص سے اپیل کی کہ پودے لگانے کے ساتھ انہیں درخت بنانے کی ذمہ داری بھی نبھائیں۔ون مہوتسو پروگرام کے دوران مختلف اسکولوں کے طلبہ کی جانب سے پیش کیے گئے رقص نے حاضرین کو متاثر کیا۔ پروگرام میں ایڈیشنل کلکٹر سندھیا رانی، آر ڈی او سما، زیڈ پی سی ای او رام ریڈی، تحصیلدار اقبال، مختلف محکمہ جات کے افسران، خواتین اور طلبہ نے شرکت کی۔
News Source : M.F. Baig Riaz
