Uproar after a fly came out of the mutton pulao at Shivaji Hotel in Hanamkonda
(اپنا ورنگل)
ہنمکنڈہ :
ہنمکنڈہ کے نکّلہ گٹہ علاقے میں واقع شیواجی ہوٹل میں اس وقت ہنگامہ کھڑا ہوگیا جب ایک گاہک کو پیش کیے گئے مٹن پلاؤ میں مکھی نظر آئی۔ کھانے میں مکھی دیکھ کر گاہکوں نے سخت ناراضگی کا اظہار کیا اور ہوٹل انتظامیہ سے جواب طلب کیا۔واقعہ کی اطلاع ملنے کے بعد متاثرہ گاہکوں نے فوڈ سیفٹی حکام سے شکایت درج کرائی۔
شکایت موصول ہوتے ہی متعلقہ افسران نے ہوٹل پہنچ کر معائنہ کیا اور وہاں صفائی کے انتظامات کا جائزہ لیا۔جانچ کے دوران حکام نے ہوٹل میں صفائی کے ناقص انتظامات اور خوراک کی تیاری و ذخیرہ کرنے کے طریقوں میں خامیاں پائیں۔ اس کے علاوہ کھانے میں مکھی پائے جانے کے واقعہ کو بھی سنگین لاپروائی قرار دیا گیا۔
گریٹر ورنگل میونسپل کارپوریشن (GWMC) کے حکام نے عوامی صحت کو مدنظر رکھتے ہوئے ہوٹل انتظامیہ پر 10 ہزار روپے کا جرمانہ عائد کیا۔ ساتھ ہی ہوٹل کے مالک کو ہدایت دی گئی کہ وہ صفائی کے معیار کو بہتر بنائیں، خوراک کی تیاری میں مکمل احتیاط برتیں اور آئندہ ایسی شکایات کی نوبت نہ آنے دیں۔
اس واقعہ کے بعد مقامی لوگوں نے مطالبہ کیا کہ شہر کے تمام ہوٹلوں میں باقاعدگی سے فوڈ سیفٹی اور صفائی کے معائنے کیے جائیں تاکہ عوام کو معیاری اور محفوظ غذا فراہم کی جا سکے۔
News Source : M.F. Baig Riaz
