The wife he trusted the most, along with her lover, poisoned her husband
(اپنا ورنگل)
27 سالہ مہیش مینا کو زہر دے کر قتل کرنے کے الزام میں پولیس نے اس کی 23 سالہ بیوی کویتا مینا اور اس کے مبینہ عاشق 27 سالہ گنیش مینا کو گرفتار کرلیا۔ پولیس کے مطابق ابتدا میں مہیش کی موت کو قدرتی موت سمجھا گیا تھا، لیکن تحقیقات میں یہ بات سامنے آئی کہ مبینہ طور پر پہلے سے منصوبہ بنا کر اسے قتل کیا گیا۔پولیس کے مطابق 5 اگست کو کویتا نے دوا دلانے کے بہانے مہیش کو موٹر سائیکل پر اپنے ساتھ لے گئی۔ الزام ہے کہ اسی دوران اس نے ایک گلاس جوس میں زہر ملا کر مہیش کو پلا دیا۔
جوس پینے کے بعد مہیش کی حالت بگڑنے لگی، جس پر کویتا نے مبینہ طور پر گنیش کو وہاں بلایا۔پولیس کے مطابق اس کے بعد کویتا اور گنیش دونوں مہیش کو موٹر سائیکل پر ایک پل کی طرف لے گئے۔ پولیس کو شبہ ہے کہ یہ سب کچھ مہیش کی موت کو بیماری کے باعث ہونے والی موت ظاہر کرنے کے مقصد سے کیا گیا تھا۔ بعد ازاں کویتا نے مہیش کے بھائی منیش کو فون کرکے بتایا کہ اس کی طبیعت بہت خراب ہے اور فوری طور پر وہاں پہنچنے کو کہا۔مہیش کو بعد میں ایک پرائیویٹ اسپتال منتقل کیا گیا، جہاں ڈاکٹروں نے اسے مردہ قرار دے دیا۔
تاہم موت کے حالات پر مہیش کے خاندان والوں کو شبہ ہوا۔ انہوں نے پولیس سے رجوع کرتے ہوئے مہیش کی موت میں کویتا اور اس کے ساتھیوں کے ملوث ہونے کا شبہ ظاہر کیا۔ڈپٹی کمشنر آف پولیس پرشانت کرن نے بتایا کہ معاملے کی سنگینی کو دیکھتے ہوئے ایک خصوصی ٹیم تشکیل دی گئی۔ ٹیم نے سی سی ٹی وی فوٹیج کا جائزہ لینے کے ساتھ شواہد کا آپس میں موازنہ کیا اور مشتبہ افراد سے پوچھ تاچھ کی۔ تحقیقات کے بعد کویتا مینا اور گنیش مینا کو گرفتار کرلیا گیا۔
News Source : Agency
