I will visit every division of Warangal East and resolve public issues: Konda Surekha
کونڈا سریکھا کے ہاتھوں 111 مستحقین میں 61 لاکھ کے سی ایم آر ایف چیکس کی تقسیم
(اپنا ورنگل)
ورنگل :
ورنگل ایسٹ رکن اسمبلی کونڈا سریکھا نے منگل کے روز اپنے کیمپ آفس میں منعقدہ ایک پروگرام کے دوران 111 مستحقین میں چیف منسٹر ریلیف فنڈ (سی ایم آر ایف) کے تحت تقریباً 61 لاکھ روپے مالیتی چیکس تقسیم کیے۔اس موقع پر میڈیا سے بات کرتے ہوئے انہوں نے کہا کہ سابقہ حکومت کے دور میں زیر التواء رکھے گئے سی ایم آر ایف چیکس آج غریب اور مستحق افراد میں تقسیم کیے گئے ہیں۔
انہوں نے تیقن دیا کہ بہت جلد تمام اہل مستحقین کو کلیان لکشمی اسکیم کے چیکس بھی حوالے کیے جائیں گے۔کونڈا سریکھا نے بتایا کہ عنقریب نئے سپر اسپیشلٹی اسپتال کی آٹھ منزلوں کو عوامی خدمات کے لیے وقف کیا جائے گا۔ انہوں نے وضاحت کی کہ کنٹریکٹر کو بلوں کی ادائیگی زیر التواء ہونے کے باعث نئے کلکٹریٹ کی عمارت کے افتتاح میں تاخیر ہو رہی ہے۔
تاریخی ورثے کے تحفظ کے حوالے سے انہوں نے کہا کہ قلعہ ورنگل میں منظر عام پر آنے والے قدیم مندروں کو ترقی دینے کا منصوبہ ہے، تاہم مرکزی حکومت سے اجازتیں حاصل نہ ہونے کے باعث اس کام میں رکاوٹ پیش آ رہی ہے۔ایم ایل اے نے کہا کہ سابقہ دور میں بحیثیت وزیر وسیع تر ذمہ داریوں کے باعث وہ ورنگل ایسٹ حلقہ کو پوری طرح وقت نہیں دے پا رہی تھیں، تاہم اب وہ ہر ہفتے ایک ڈویژن کا دورہ کرتے ہوئے عوامی مسائل سے واقفیت حاصل کریں گی اور ان کے حل کے لیے اقدامات کریں گی۔
انہوں نے یقین دلایا کہ ڈویژنوں کی سطح پر اندراما مکانات سے متعلق مسائل کو جلد حل کیا جائے گا اور صحافیوں کو بھی بہت جلد ڈبل بیڈروم مکانات فراہم کیے جائیں گے۔ انہوں نے مزید بتایا کہ حلقہ کے مختلف مندروں کی ترقی کے لیے پہلے ہی فنڈس منظور کیے جا چکے ہیں۔سابقہ بی آر ایس حکومت پر تنقید کرتے ہوئے کونڈا سریکھا نے الزام عائد کیا کہ گزشتہ دس سالہ دور حکومت میں ایم جی ایم اسپتال کی ترقی کے لیے کوئی خاطر خواہ اقدامات نہیں کیے گئے۔
انہوں نے اپوزیشن قائدین کے اسپتال کے دوروں پر طنز کرتے ہوئے کہا کہ بعض قائدین اسپتال کے دورے کے نام پر وہاں پہنچ کر جھگڑے کرتے ہیں اور خود اسپتال میں داخل ہو جاتے ہیں۔اپوزیشن قائدین کو سخت انتباہ دیتے ہوئے انہوں نے کہا کہ وہ غیر ضروری بیانات دینے سے گریز کریں اور اپنی زبان پر قابو رکھیں، ورنہ خواتین ان کی چپلوں اور جھاڑوؤں سے خبر لیں گی۔
آئندہ گریٹر کارپوریشن اور مقامی اداروں کے انتخابات کے حوالے سے انہوں نے اعتماد ظاہر کیا کہ ورنگل ایسٹ کے تحت آنے والی تمام 24 نشستوں پر ان کی پارٹی کامیابی حاصل کرے گی۔انہوں نے پارٹی قائدین اور کارکنوں سے اپیل کی کہ وہ داخلی اختلافات کو بالائے طاق رکھتے ہوئے متحد ہو کر عوامی مسائل کے حل کو اپنا اولین مقصد بنائیں۔
