Central government’s positive response to MP Ravichandra’s requests
(اپنا ورنگل)
حیدرآباد :
بی آر ایس پارلیمانی پارٹی کے ڈپٹی لیڈر اور راجیہ سبھا کے رکن وددیراجو روی چندر کی درخواستوں پر مرکزی حکومت نے مثبت ردعمل کا اظہار کیا ہے۔ ایم پی روی چندر نے بھدرادری کوتھاگڈیم ضلع کی ہمہ گیر ترقی کے لیے پارلیمنٹ کے زیرو آور میں تین اہم مطالبات پیش کیے تھے: آل انڈیا انسٹی ٹیوٹ آف میڈیکل سائنسز (ایمس)، گرین فیلڈ ایئرپورٹ اور ریلوے ڈیویزن کا قیام۔ اس سلسلے میں انہوں نے صحت، شہری ہوابازی اور ریلوے کے وزراء کو تفصیلی یادداشتیں بھی پیش کیں۔
بروز جمعہ مرکزی وزارتوں نے ایم پی وددیراجو کو تحریری جواب دیتے ہوئے ان تجاویز پر مثبت رویے کا اظہار کیا۔ وزارتوں نے اپنے خط میں کہا کہ بھدرادری کوتھاگڈیم کو صنعتی، توانائی اور لاجسٹکس مرکز کے طور پر ترقی دینے کی ایم پی روی چندر کی تجاویز کو تسلیم کیا گیا ہے۔ اپنی یادداشت میں ایم پی روی چندر نے نشاندہی کی تھی کہ سنگرینی کمپنی ملک کی توانائی ضروریات کے لیے کوئلہ فراہم کرتی ہے جس کا مرکزی مقام کوتھاگڈیم ہے۔جنوبی ایودھیا کے نام سے مشہور بھدراچلم میں شری سیتا رام چندر سوامی کا مندر واقع ہے اور جنوبی گنگا کہلانے والی گوداوری اسی ضلع سے گزرتی ہے۔
انہوں نے مزید کہا کہ 1932 میں کوتھاگڈیم (بھدراچلم روڈ) ریلوے اسٹیشن کا افتتاح ہوا تھا۔ صد سالہ تقریبات کے موقع پر اسے ڈیویزن کا درجہ دے کر بھدراچلم کے راستے بستر (چھتیس گڑھ) اور ملکانگیری (اڈیشہ) تک توسیع دی جائے تو یہ ضلع آندھرا پردیش، تلنگانہ سمیت 4 ریاستوں کا اہم جنکشن بن کر ترقی کرے گا۔
ان نکات کا جائزہ لینے کے بعد مرکزی حکومت نے ریلوے ڈیویزن، ایمس اور گرین فیلڈ ہوائی اڈے کے قیام کے مطالبے پر مثبت رویہ ظاہر کرتے ہوئے ایم پی کو تحریری جواب دیا۔ اس ضمن میں مرکزی وزیر مملکت برائے تجارت، صنعت، الیکٹرانکس و آئی ٹی جتین پرساد نے ایم پی وددیراجو روی چندر کو باضابطہ خط ارسال کیا ہے۔
News Source : Mohd. Fazal ur Rahman
