Members of Parliament and Assembly meet with Chief Minister Revanth Reddy, express gratitude for approval of UGD funds
(اپنا ورنگل)
ورنگل :
ورنگل کے تین شہروں ورنگل، ہنمکنڈہ اور قاضی پیٹ میں انڈر گراؤنڈ ڈرینیج (UGD) نظام کی تعمیر کے لیے ریاستی حکومت کی جانب سے بھاری فنڈز کی منظوری کے بعد عوامی نمائندوں نے ریاست کے وزیر اعلیٰ ریونت ریڈی سے حیدرآباد میں ملاقات کی اور ان کا شکریہ ادا کیا۔ انتخابی مہم کے دوران تینوں شہروں کی ترقی کے لیے انڈر گراؤنڈ ڈرینیج نظام قائم کرنے کے وعدے کے مطابق ریاستی حکومت نے 5257.20 کروڑ روپے کے فنڈز منظور کیے ہیں۔ اس موقع پر رکن پارلیمنٹ کڈیئم کاویا ، ورنگل ویسٹ کے رکن اسمبلی نائنی راجندر ریڈی، ارکان اسمبلی کڈیئم سری ہری، ریوری پرکاش ریڈی، کے آر ناگراجو اور رکن قانون ساز کونسل بسواراجو ساریہ نے وزیر اعلیٰ سے ملاقات کر کے ان کا شکریہ ادا کیا۔
اس موقع پر رکن اسمبلی نائنی راجندر ریڈی نے کہا کہ انتخابی وعدے کے مطابق ورنگل کے عوام کی دیرینہ خواہش کو پورا کرنے کے لیے حکومت کی جانب سے فنڈز کی منظوری خوش آئند اقدام ہے۔ انہوں نے کہا کہ عوام نے ان پر جو اعتماد ظاہر کیا ہے، اس پر پورا اترنا ان کے لیے باعثِ فخر ہے۔انہوں نے مزید کہا کہ ورنگل شہر کی ترقی کے لیے انڈر گراؤنڈ ڈرینیج منصوبہ نہایت اہم ہے۔ کئی برسوں سے زیر التواء اس مسئلے کو حل کرنے کے لیے حکومت کی جانب سے بڑے پیمانے پر فنڈز کی منظوری قابلِ ستائش ہے۔انہوں نے کہا کہ بڑھتی ہوئی آبادی کے پیش نظر جدید بنیادی سہولیات ناگزیر ہیں۔
انڈر گراؤنڈ ڈرینیج نظام کے نفاذ سے شہروں میں صفائی کے حالات بہتر ہوں گے اور عوام کی صحت کے تحفظ میں بھی مدد ملے گی۔نائنی راجندر ریڈی نے کہا کہ حکومت کا یہ فیصلہ ورنگل کی ترقی کے لیے ایک نئی سمت متعین کرے گا اور مستقبل میں شہر کو جدید بنیادی سہولیات سے آراستہ کرنے میں اہم کردار ادا کرے گا۔اس موقع پر عوامی نمائندوں نے ورنگل کے عوام کی جانب سے وزیر اعلیٰ ریونت ریڈی کا خصوصی طور پر شکریہ ادا کیا۔
News Source : M.F. Baig Riaz
