Warangal Police Commissioner inspects Chennaraopet police station, declares public justice as top priority
(اپنا ورنگل)
ورنگل:
ورنگل پولیس کمشنر سن پریت سنگھ نے بروز چہارشنبہ ایسٹ زون کے تحت چناراؤ پیٹ پولیس اسٹیشن کا اچانک دورہ کیا۔ اس موقع پر انہوں نے اسٹیشن افسران کو ہدایت دی کہ عوامی شکایات کی تحقیقات مکمل شفافیت کے ساتھ کی جائیں اور متاثرین کے ساتھ کھڑے ہو کر انصاف فراہم کیا جائے۔ صبح پولیس اسٹیشن پہنچنے پر ایسٹ زون ڈی سی پی انکت کمار نے کمشنر کا استقبال کرتے ہوئے انہیں پودے پیش کیے۔ کمشنر نے اسٹیشن کے احاطے کا معائنہ کیا اور ریسپشن، آئی ٹی سیکشن سمیت دیگر پولیس عملے کی کارکردگی کا جائزہ لیا۔
معائنے کے دوران سی پی نے اسٹیشن کے ریکارڈ، راؤڈی شیٹرز اور مشتبہ افراد کی فائلوں کے ساتھ زیرالتواء مقدمات کا بھی بغور جائزہ لیا۔ انہوں نے موقع پر موجود پولیس اہلکاروں سے ان کے مسائل دریافت کیے اور فوری حل کی یقین دہانی کرائی۔ اسٹیشن کے عملے سے خطاب کرتے ہوئے پولیس کمشنر سن پریت سنگھ نے کہا کہ ہر کانسٹیبل گاؤں کا دورہ کرے اور امن و امان سے متعلق مسائل کی معلومات حاصل کرے۔
انہوں نے مزید ہدایت دی کہ ہر گاؤں والے کو ٹریفک قوانین پر عمل کرنے کے لیے بیدار کیا جائے تاکہ سڑک حادثات کو روکا جا سکے۔غیر قانونی ریت کی نقل و حمل اور اسکولوں کے اطراف تمباکو مصنوعات فروخت کرنے والوں کے خلاف سخت کارروائی کی جائے۔
ہر شکایت کی جانچ غیر جانبدارانہ اور شفاف طریقے سے مکمل کر کے متاثرہ فریق کو انصاف دلایا جائے۔ اس معائنے کے موقع پر نرسم پیٹ اے سی پی رویندر ریڈی، نیکونڈہ سی آئی سرینواس، چناراؤ پیٹ اور نیکونڈہ کے ایس آئی راکیش ریڈی اور مہیندر بھی موجود تھے۔
News Source : Mohd. Fazal ur Rahman
