BRS protests against NEET cancellation in Warangal, where did the slogan ‘Beti Bachao’ go? Nannapuneni Narender questions BJP
(اپنا ورنگل)
ورنگل :
نیٹ امتحان کی منسوخی کے خلاف ورنگل چوراستہ میں بی آر ایس پارٹی کی جانب سے احتجاجی پروگرام منعقد کیا گیا۔ اس موقع پرنَنّاپونینی نریندر نے بی جے پی حکومت کو شدید تنقید کا نشانہ بناتے ہوئے کہا کہ ’’بیٹی بچاؤ، بیٹی پڑھاؤ‘‘ کا نعرہ دینے والی بی جے پی ہی آج نیٹ امتحان کی منسوخی کے ذریعے طلباء کے مستقبل کو خطرے میں ڈال رہی ہے۔
احتجاج کے دوران نَنّاپونینی نریندر نے شری رام کی خصوصی پوجا انجام دی اور شری رام کو گواہ بنا کر بی جے پی قائدین سے کئی سوالات کیے۔بعد ازاں میڈیا سے بات کرتے ہوئے انہوں نے کہا کہ ملک میں جمہوری اقدار کمزور ہو رہی ہیں اور عوام کے بنیادی مسائل کو نظر انداز کیا جا رہا ہے۔
انہوں نے کہا کہ 2014 میں عوام نے بڑی امیدوں کے ساتھ نریندرا مودی کی قیادت میں حکومت منتخب کی، مگر آج خواتین کی حفاظت اور نوجوانوں کے مستقبل پر سنگین سوالات کھڑے ہو رہے ہیں۔انہوں نے الزام لگایا کہ خواتین کے تحفظ کے دعوے صرف نعروں تک محدود ہیں، جبکہ حقیقت میں متاثرین کو انصاف دینے کے بجائے ان پر ہی دباؤ ڈالا جا رہا ہے۔
نریندر نے نیٹ امتحان کی بار بار منسوخی کو مرکزی حکومت کی ناکامی قرار دیتے ہوئے کہا کہ اس کی مکمل ذمہ داری مرکز کو قبول کرنی چاہیے۔ انہوں نے مزید کہا کہ ملک میں تعلیم اور روزگار سے متعلق امتحانات بارہا لیک ہو رہے ہیں، جس سے لاکھوں طلباء کا مستقبل متاثر ہو رہا ہے۔
انہوں نے مطالبہ کیا کہ حکومت صرف وعدے کرنے کے بجائے عملی اقدامات کرے اور طلباء کو انصاف فراہم کرے۔اس احتجاجی پروگرام میں بی آر ایس پارٹی کے سابق کارپوریٹرز، ڈویژن صدور، انچارجز، نوجوان قائدین، خواتین رہنما اور کارکنان کی بڑی تعداد نے شرکت کی۔
News Source : M.F. Baig Riaz
