Serving the country even while living abroad: Dr. Muhammad Qutbuddin’s exemplary feat
(اپنا ورنگل)
نارائن پیٹ :
شکاگو، امریکہ میں مقیم معروف ماہرِ نفسیات ڈاکٹر محمد قطب الدین اگرچہ طویل عرصے سے بیرونِ ملک خدمات انجام دے رہے ہیں، تاہم ان کا دل آج بھی نارائن پیٹ کی مٹی سے پوری طرح جڑا ہوا ہے۔ خدمتِ خلق کو اپنا مشن بنانے والے ڈاکٹر قطب الدین کا انسان دوست نظریہ آج معاشرے کے لیے ایک مثالی نمونہ بن چکا ہے۔ بیرونِ ملک قیام کے باوجود انہوں نے اپنی جنم بھومی کو کبھی فراموش نہیں کیا اور عملی طور پر یہ ثابت کیا ہے کہ “جنم بھومی کا قرض ادا کرنا ہر باشعور انسان کا فرض ہے”۔
غریب اور نادار عوام کے لیے مفت طبی کیمپوں کا انعقاد، ضروری علاج و مشاورت کی فراہمی اور انسانی ہمدردی پر مبنی خدمات کے ذریعے انہوں نے یہ واضح کر دیا ہے کہ طب محض ایک پیشہ نہیں بلکہ ایک عظیم انسانی خدمت ہے۔تعلیم کو سماجی ترقی کی بنیاد تصور کرتے ہوئے ڈاکٹر محمد قطب الدین نے اپنی والدہ مرحومہ کے نام پر ایک کتب خانہ اور اپنے دادا مرحوم کی یاد میں ایک اور کتب خانہ قائم کیا، جو ان کے خاندانی اقدار اور علم دوستی کا روشن ثبوت ہے۔
اسی طرح جدید تقاضوں کو پیشِ نظر رکھتے ہوئے انہوں نے بچپن ہی سے طلبہ کو ٹیکنالوجی سے جوڑنے کے مقصد سے کمپیوٹر تعلیم کے فروغ پر خصوصی توجہ دی۔اسی سلسلے میں نارائن پیٹ میں نور جہاں و عبدالحفیظ کمپیوٹر انسٹیٹیوٹ کا قیام عمل میں لایا گیا، جہاں درجنوں طلبہ و طالبات مفت کمپیوٹر تعلیم حاصل کر رہے ہیں، جو ایک قابلِ تحسین اور دور اندیش اقدام ہے۔نارائن پیٹ کو ضلع کا درجہ ملنے کے موقع پر ڈاکٹر قطب الدین نے اُس وقت کے وزیر اعلیٰ کے۔
چندر شیکھر راؤ اور وزیر کے ٹی آر سے بالمشافہ ملاقات کرتے ہوئے ضلع کی مجموعی ترقی کے لیے تحریری عرضداشت پیش کی، جو ان کی نارائن پیٹ سے گہری وابستگی کا واضح اظہار ہے۔میڈیا کے شعبے سے اپنی قدر شناسی کا مظاہرہ کرتے ہوئے انہوں نے صحافیوں کو ڈائریاں اور قلم پیش کیے، جس سے ان کے دل میں اہلِ قلم کے لیے احترام اور ہمدردی کے جذبات نمایاں ہوتے ہیں۔
ہر دورۂ نارائن پیٹ کے موقع پر تمام سیاسی جماعتوں کے قائدین سے ملاقات، ان کی عزت افزائی، اور اعلیٰ تعلیم حاصل کرنے والے طلبہ کی حوصلہ افزائی ان کے وسیع ظرف اور مثبت سوچ کی غماز ہے۔ڈاکٹر محمد قطب الدین کی سماجی خدمات، انکساری اور جنم بھومی سے بے لوث محبت آج نارائن پیٹ کے عوام کے لیے باعثِ فخر بن چکی ہیں۔ عوامی حلقوں کا کہنا ہے کہ ضلع نارائن پیٹ کے نام اور وقار کو ملکی و بین الاقوامی سطح پر اجاگر کرنے میں ڈاکٹر قطب الدین کا کردار ناقابلِ فراموش اور بے مثال ہے۔
اس موقع پر ڈاکٹر محمد قطب الدین، ماہر نفسیات (شکاگو، امریکہ) کے دورۂ نارائن پیٹ کے دوران ضلع کے مختلف صحافیوں نے ان سے ملاقات کر کے تہنیت پیش کی اور ان کی خدمات کو خراجِ تحسین پیش کیا۔
News Source : Mohd. Taqi
