Starting with friendship on Facebook, Millions were collected by luring huge profits through a fake trading website
حیدرآباد کے ڈاکٹر سے آن لائن سرمایہ کاری کے بہانے 14 کروڑ روپے کا سائبر فراڈ۔
(اپنا ورنگل)
حیدرآباد :
تلنگانہ میں ایک بڑا سائبر دھوکہ دہی کا معاملہ منظرِ عام پر آیا ہے، جس میں حیدرآباد کے ایک ڈاکٹر کو آن لائن سرمایہ کاری کے نام پر تقریباً 14 کروڑ روپے سے محروم کر دیا گیا۔تفصیلات کے مطابق ایک خاتون نے خود کو ’مونیکا مادھون‘ کے نام سے فیس بک پر متعارف کراتے ہوئے متاثرہ ڈاکٹر سے دوستی کی اور بعد ازاں ایک جعلی ٹریڈنگ ویب سائٹ کا لنک ارسال کیا۔
بڑے منافع کی پیشکش پر ڈاکٹر نے بھاری رقوم جمع کرائیں، مگر جب رقم واپس لینے کی کوشش کی تو ویب سائٹ انتظامیہ نے مختلف وجوہات، خصوصاً ٹیکس کی ادائیگی کا بہانہ بنا کر مزید رقم وصول کر لی۔ذرائع کے مطابق متاثرہ شخص نے بارہا کوشش کے باوجود اپنی رقم واپس نہ ملنے پر معاملہ مشکوک محسوس کیا اور فوری طور پر سائبر کرائم پولیس سے رجوع کیا۔
پولیس نے شکایت درج کر کے تحقیقات کا آغاز کر دیا ہے۔حیدرآباد سائبر سکیورٹی بیورو نے عوام کو ایک بار پھر متنبہ کرتے ہوئے خبردار کیا ہے کہ ایسے آن لائن سرمایہ کاری کے جال میں نہ پھنسیں اور کسی نامعلوم ویب سائٹ یا فرد پر اندھا اعتماد نہ کریں، تاکہ اپنی محنت کی کمائی سے محروم نہ ہونا پڑے۔
News Source : Agency
