Former cricketer mohammad azharuddin took oath as a minister
حیدرآباد :
(اپنا ورنگل)
ہندوستانی کرکٹ ٹیم کے سابق کپتان اور کانگریس کے سینئر رہنما محمد اظہرالدین نے جمعہ کو راج بھون میں ایک شاندار تقریب کے دوران وزیر کی حیثیت سے حلف لیا۔ گورنر تلنگانہ جیشنو دیو ورما نے اظہرالدین سے رازداری کا حلف لیا۔ اس موقع پر چیف منسٹر اے ریونت ریڈی، ریاستی کابینہ کے وزراء، کانگریس کے ارکان اسمبلی و قانون ساز کونسل، ارکان پارلیمنٹ اور دیگر معززین بڑی تعداد میں موجود تھے۔
ذرائع کے مطابق، اظہرالدین کو ریاستی کابینہ میں اقلیتی بہبود، کھیل و نوجوانان امور کا قلمدان دیے جانے کا امکان ہے۔ اظہرالدین کے شامل ہونے سے ریونت ریڈی کابینہ میں ایک اور اہم اضافہ ہوا ہے، جسے کانگریس حلقوں میں خوش آئند قدم کے طور پر دیکھا جا رہا ہے۔
محمد اظہرالدین کا تعلق حیدرآباد سے ہے۔ انہوں نے 1984 میں کرکٹ کی دنیا میں قدم رکھا اور اپنی شاندار بیٹنگ، نفیس انداز اور شاندار قیادت کے سبب بین الاقوامی شہرت حاصل کی۔ اظہرالدین نے کپتان کی حیثیت سے 99 ٹیسٹ اور 334 ون ڈے میچوں میں ہندوستانی ٹیم کی نمائندگی کی۔ریٹائرمنٹ کے بعد انہوں نے سیاست میں قدم رکھا اور 2009 میں کانگریس کے ٹکٹ پر مرادآباد (اترپردیش) سے لوک سبھا کے لیے منتخب ہوئے۔ تلنگانہ کی تشکیل کے بعد وہ ریاستی سیاست میں سرگرم رہے اور تلنگانہ کانگریس کے ورکنگ پریسیڈنٹ کی حیثیت سے خدمات انجام دیں۔
حلف برداری کے بعد میڈیا سے گفتگو کرتے ہوئے اظہرالدین نے کہا کہ وہ تلنگانہ کے نوجوانوں اور اقلیتوں کی ترقی کے لیے بھرپور کوشش کریں گے۔ انہوں نے کہا کہ کھیلوں کے فروغ، روزگار کے مواقع اور اقلیتوں کی فلاحی اسکیموں پر خصوصی توجہ دی جائے گی۔راج بھون کی اس تقریب میں سیاسی و سماجی شخصیات کے ساتھ ساتھ متعدد سابق کھلاڑیوں نے بھی شرکت کی، جنہوں نے اظہرالدین کو مبارکباد دی اور ان کی کامیابی کے لیے نیک تمناؤں کا اظہار کیا۔
News Source : Agency
