Warangal Police Commissioner inspected the police control room.
ورنگل- 6/ ستمبر
( اپنا ورنگل )
ورنگل پولیس کمشنر جناب سن پریت سنگھ نے بروز ہفتہ پولیس کمشنریٹ کنٹرول روم کا دورہ کیا۔ اس موقع پر پولیس کمشنر نے کنٹرول روم میں خدمات انجام دے رہے عملے سے بات چیت کی اور ایمرجنسی کالز کی وصولی، ان پر فوری ردعمل اور ڈائل 100 کی سرگرمیوں کا جائزہ لیا۔ پولیس کمشنر نے ہدایت دی کہ عوام کی جانب سے موصول ہونے والی ہر کال کو نہایت سنجیدگی اور فوری ردعمل کے ساتھ نمٹایا جائے تاکہ عوامی مسائل کا فوری حل ممکن ہوسکے۔ انہوں نے خاص طور پر آدھی رات کے اوقات میں پیٹرولنگ کرنے والے افسران اور عملے کو ہدایت دی کہ ایمرجنسی حالات میں چوکسی کے ساتھ ذمہ داریاں انجام دیں اور ایک دوسرے کے ساتھ مؤثر ہم آہنگی رکھیں۔ پولیس کمشنر سن پریت سنگھ نے کہا کہ جدید ٹیکنالوجی کے مؤثر استعمال کے ذریعہ عوام کو مزید بہتر خدمات فراہم کرنا محکمہ پولیس کا اولین مقصد ہے۔ انہوں نے واضح کیا کہ پولیس کنٹرول روم ہر حال میں چوبیس گھنٹے عوام کے لیے دستیاب رہے گا اور کسی بھی ہنگامی صورتحال میں فوری اقدامات کیے جائیں گے۔
News Source : Mohd. Fazal ur Rahman Wajid
